Служба преподобному Гавриилу Седмиезерному

На Господи воззвах, стихиры, глас 8:

Преподобен и честен светильник божественный и светоносный,/ под спудом житейския толстоты никогдаже скрывается: / но на версе полагает его / высоких чудес Человеколюбец. // Того молитвами, Христе, даруй людем твоим велию милость.

На рало возложил еси, всечестне, делание рук твоих, / делая всегда божественная,/ и не возвратился еси вспять: / но был еси управлен во Царствие Христа воплощшагося Бога, // во спасение душ наших.

В ладии телесней возим, / кроткими дыхании кроткого духа, / легко прешел еси житейскую пучину, мудре: / и на бисере многоценнем твоя имения продав, / и обрет его в себе удержал еси, // блажен быв божественными добротами Его.

Слава, глас 6:

Еже по образу соблюд невредимо, / ум Владыку на страсти пагубныя постнически поставив,/ во еже по подобию яко мощно возшел еси: / мужески бо естество понудив, / потщался еси хуждшее покорити лучшему,/ и плоть поработити духу. / Темже монашествующих явился еси наставник, / житель пустынный, благотекущих обучитель,/ правило добродетели известнейшее: / и ныне на небесех зерцалом разрешшымся отче наш, Гаврииле,/ чисте зриши Святую Троицу, // молися несредственне о иже верою и любовию чтущих тя.

И ныне, Богородичен, глас тойже:

На стиховне стихиры, глас 1:

Наста богоносне,/ солнца светлейший твой праздник, / озаряет приходящия к тебе верою, / и безсмертием облагоухает, / и душам источает исцеления/, Гаврииле преподобие, // молитвенниче о душах наших.

Стих: Честна пред Господем / смерть преподобных Его.

Чувственныя страсти телесныя,/ победив воздержания броздами,/ чудодейственниче Гаврииле, / и ревности безплотных на земли показав, / вся плотская желания духу повинул еси: / тем ныне в небесных селениих водворяяся, // молися о душах наших.

Стих: Блажен муж бояйся Господа, / в заповедех Его восхощет зело.

Блаженне Гаврииле, / основание положив добродетели, / древняго человека совлеклся еси с похотьми, / и во Христа облеклся еси воистинну: / тем и обличил еси преподобие многия вражия ополчения, / наставник монахов быв, // моли спастися душам нашим.

Слава, глас 8:

Монахов множества , / наставника тя почитаем отче наш Гаврииле: / твоею бо стезею воистинну право ходити познахом: / блажен еси Христу работав, / и вражию обличил еси силу, / Ангелов собеседниче, преподобных сопричастниче и праведных, / с нимиже молися Господеви, // помиловатися душам нашим.

Тропарь, глас 4:

От юности, богомудре, просветився любовию Христовою, / суетный и многомятежный мир оставил еси. / Житие свое вверя предстательству Пречистыя Богородицы, / слез потоки изливал еси пред пречистым Ея образом, / и теченьми их седьм езер освятил еси. / И терпения ради украси тя небесными дарами Христос Бог наш, / в чудесех и ученицех славна показа земле Казанской.

Кондак, глас 5:

Претерпел еси скорби и наветы вражия / благодушно, кротостью, любовью и смирением побеждати зло научил еси, / теплою молитвою со слезами предстал еси Господу, / созерцая тайная и будущая, яко настоящая, / преподобие отче Гаврииле, не остави чад твоих / усердным и скорым к Богу ходатайством.

По 50- ом псалме стихира, глас 6:

Преподобие отче Гаврииле, / во всю землю изыде вещание исправлений твоих: / темже на небесех обрел еси мзду трудов твоих, / демонския разорил еси полчища, / и Ангельския достигл еси чины, / ихже житию непорочно поревновал еси. / Дерзновение имея ко Христу Богу, // мир испроси душам нашим.

На хвалитех стихиры, глас 6:

Богоносне преблаженне Гаврииле, / все плотское мудрование Богу повинул еси, / пощения страданьми утвердився, / яко злато в горниле искушено сияя явися, / приятелище был еси Духа Пресвятаго. / Собрав монашествующих множества, / и учении твоими, / яко некоею лествицею восходною на небо, / на высоту добродетелей возвел еси. / поминай нас чтущих память твою присно священную, // и моли спастися душам нашим.

Возсия днесь пресветлая и всепразднственная память твоя, / преславне Гаврииле, / созывающи многочисленное постник сословие,/ и преподобных ликостояния: / Ангелы же с человеки / яко воистину к похвалению в Троице поклоняема Христа Бога нашего. / Темже притекающе ко священней раце мощей твоих, / исцеления дары обильно приемлем,/ и тебе венчавшего Христа прославляем, / Спаса душ наших.

Слава, глас 2:

Преподобие отче Гаврииле, / из младенства добродетели прилежно обучився, / орган был еси Святаго Духа, / и от Него приим чедес действо, / увещал еси человеки преобидети сладкая: / ныне же Божественным светом чистейше осияваем, / просвети и наша мысли, / Гаврииле отче наш.